Ci hè calchì verbu chì hè prunuminali in francesu è nonprunuminali in corsu. Par indittu ci hè u verbu spassià  (cismuntincu spassighjà) chì hè nonprunuminali in corsu è chì pò essa usatu in modu prunuminali in francesu (“se promener”). Ci hè dinò piantà chì currispondi in certi casi à u francesu “s’arrêter”. Ci hè ancu migliurà chì voli dì “s’améliorer” in francesu.

Ci ni sarà altri assà di sti verbi?

In u puemettu di Baudelaire, l’occurrenza di spassià ùn hè micca bè tradutta, chì u traduttori automaticu hè ingannatu par via di u sughjettu (un beddu ghjattu…) chì si trova daretu à u verbu, è ùn ricunnosci ancora ‘ssa struttura…

U mutori grammaticali hà fattu una muta. Si diciaria ch’eddu pò fà i cosi intarissanti… Da suvità.

Si metti avà a traduzioni à u provu, incù l’articulu di u ghjornu di l’anciclupidia wikipedia in francesu. Ci hè un’infrasata schietta, ma fermani parechji sbaglii, frà i quali:

• dopu à quattordici anni
• brama di crià: a traduzioni di u verbu francesu “souhaiter” hè tuttu un  capatoghju, chì u so sensu hè à quandu augurà, à quandu bramà (com’è quì), sicondu u cuntestu
• è canzoni più corti
• induv’eddu figura

Valutazioni: 1 – (7/105) = 93,33%.

Eccu u prugressu di u ghjornu, cuncirnendu u verbu “chjamà”. Un picculu migliuramentu. Ma centu pocu facini un assà…

Par quiddi chì voni pruvà: eccu una virsioni sperimintali di u traduttori (da u francesu à u corsu). Ùn hè micca parfettu, ma forsi cù u tempu, hà da migliurà…

Attenti chì ùn ci vò micca ch’eddi ci fussini i sbagli d’urtugrafia in u testu in francesu, chì tandu i paroli ùn sò micca tradutti.